Самарда да бүген сугышка каршы чара уза. Хәбәрчебез әйтүенчә, анда 250ләп кеше катнаша, тоткарланучылар да бар.
Русия баш прокуратурасы украин хәрбиләренә финанс, матди-техник һәм башка төрле ярдәм өчен илгә хыянәт итү маддәсе нигезендә җинаять эше ачу белән яный.
Уфада әле генә өч кешене тоткарлаганнар. Анда "Яз" хәрәкәте сугышка каршы акция үткәрмәкче булган. Активистлар плакатсыз гына басып торган.
Украина Һаагадагы халыкара мәхкәмәгә Русиягә каршы шикаять тапшырган. Бу хакта Украина президенты Владимир Зеленский хәбәр итә.
Украина халкы Русия хәрбиләрен "молотов коктейльләре" белән каршылый
Киев янында украиннар илгә бәреп кергән Русия хәрбиләрен каршыларга әзерләнә, “молотов коктейльләре” ясый. Алар үз ватаннарын саклау өчен мөмкин булганча каршылык күрсәтә. Украина эчке эшләр министрлыгы Русия хәрби техникасын яндыру өчен иң яхшы “коктейль” рецептын интернет аша тарата.
- Австрия, Ирландия һәм Дания Русия очкычлары өчен һава киңлеген яба. Элегрәк мондый карарны Словения, Румыния, Литва, Латвия, Эстония, Чехия, Польша һәм Болгарстан кабул иткән иде. AirBaltic Русиягә очышларны 26 мартка кадәр туктатып тора.
Киевка кергән Русия хәрби техникасын яндыралар
Киев урамнарында Русиянең шартлатылган, яндырылган хәрби техникасы очрый. Украина башкаласына кергән Русия хәрбиләре каты каршылыкка юлыга.
Украина президенты Владимир Зеленский Беларус ватандашларына мөрәҗәгать белән чыкты һәм элекке кебек игелекле һәм имин ил булырга чакырды. Шунда ук ул Русия белән сөйләшүләрне Беларустан алып барудан баш тартты дияргә була. Зеленский әйтүенчә, ул сөйләшүләрне “ракеталар очмаган илдән” алып барырга әзер.
“Русиягә сөйләшүләр өчен без Варшау, Истанбул, Баку шәһәрләрен тәкъдим иттек, башка шәһәрләр дә була ала”, диде ул.
Элегрәк Украина белән сөйләшүләр башлау өчен Русия вәкиллегенең Беларуска инде килүе хәбәр ителгән иде.